ກອງປະຊຸມຈຸດປະສານງານ ປພຍ ແຫ່ງຊາດ ເພື່ອຜ່ານຮ່າງທໍາອິດບົດລາຍງານແຫ່ງຊາດແບບສະໝັກໃຈສະບັບທີ 2 ຂອງ ສປປ ລາວ ແລະ ແຜນການຈັດຕັ້ງປະຕິບັດວາລະ 2030 ເພື່ອການພັດທະນາແບບຍືນຍົງ ຢູ່ ສປປ ລາວ ປະຈໍາປີ 2021

ໃນວັນທີ 17 ມີນາ 2021, ກອງເລຂາຄະນະຊີ້ນໍາລະດັບຊາດເພື່ອການຈັດຕັ້ງປະຕິບັດເປົ້າໝາຍການພັດທະນາແບບຍືນຍົງ (ກອງເລຂາ ປພຍ ແຫ່ງຊາດ) ໄດ້ຈັດ ກອງປະຊຸມຈຸດປະສານງານ ປພຍ ແຫ່ງຊາດ ເພື່ອຜ່ານຮ່າງທໍາອິດບົດລາຍງານແຫ່ງຊາດແບບສະໝັກໃຈສະບັບທີ 2 ຂອງ ສປປ ລາວ ແລະ ແຜນການຈັດຕັ້ງປະຕິບັດວາລະ 2030 ເພື່ອການພັດທະນາແບບຍືນຍົງ ຢູ່ ສປປ ລາວ ປະຈໍາປີ 2021, ທີ່ສູນການຝຶກອົບຮົມ ແລະ ການຮ່ວມມືສາກົນ (ICTC), ນະຄອນຫຼວງວຽງຈັນ. ກອງປະຊຸມແມ່ນດໍາເນີນພາຍໃຕ້ການເປັນປະທານຂອງ ທ່ານ ໄມທອງ ທໍາມະວົງສາ, ຫົວໜ້າກົມອົງການຈັດຕັ້ງສາກົນ, ກະຊວງການຕ່າງປະເທດ, ທັງເປັນຫົວໜ້າກອງເລຂາ ປພຍ ແຫ່ງຊາດ.

ກອງປະຊຸມມີຜູ້ຕາງໜ້າຈາກຈຸດປະສານງານ ປພຍ ແຫ່ງຊາດ ຄະນະກົມ, ​ຄະນະພະແນກ ແລະ ວິຊາການ ຂອງບັນດາກະຊວງ ແລະ ອົງການລັດທຽບເທົ່າກະຊວງ ເຂົ້າຮ່ວມຫຼາຍກ່ວາ 60 ທ່ານ. ກອງປະຊຸມໃນຄັ້ງນີ້ມີຈຸດປະສົງເພື່ອແລກປ່ຽນຄໍາຄິດເຫັນ ແລະ ປຶກສາຫາລືກ່ຽວກັບ ຮ່າງທໍາອິດຂອງ ບົດລາຍງານແຫ່ງຊາດແບບສະໝັກໃຈ (VNR) ສະບັບທີ 2 ຂອງ ສປປ ລາວ ທີ່ຈະນໍາສະເໜີຕໍ່ກອງປະຊຸມເວທີການເມືອງລະດັບສູງຂອງ ອົງການ ສປຊ (HLPF) ໃນເດືອນກໍລະກົດ ປີ 2021 ນີ້, ເຊິ່ງກອງປະຊຸມໄດ້ລົງເລີກດ້ານເນື້ອໃນ ແລະ ບັນດາຂໍ້ມູນຕົວຊີ້ບອກທີ່ກວມຢູ່ໃນຮ່າງບົດລາຍງານດັ່ງກ່າວ, ໂດຍສະເພາະເນື້ອໃນຄວາມຄືບໜ້າໃນການຈັດຕັ້ງປະຕິບັດ ປພຍ ພາຍຫຼັງທີ່ ສປປ ລາວ ໄດ້ສົ່ງບົດລາຍງານ VNR ສະບັບທໍາອິດໃນປີ 2018.

ພ້ອມກັນນັ້ນ, ກອງປະຊຸມຍັງມີຈຸດປະສົງໃນການນໍາສະເໜີແຜນງານຈັດຕັ້ງປະຕິບັດ ຫຼື ການກະກຽມນໍາສະເໜີບົດລາຍງານ VNR Roadmap ແລະ ແຜນວຽກລວມການຈັດຕັ້ງປະຕິບັດວາລະ 2030 ເພື່ອການພັດທະນາແບບຍືນຍົງ ຢູ່ ສປປ ລາວ ປະຈໍາປີ 2021 ອີກດ້ວຍ.

ຂະບວນການສົ່ງບົດລາຍງານແຫ່ງຊາດແບບສະໝັກໃຈ (VNR) ແມ່ນມີຄວາມສໍາຄັັນໃນການຂັບເຄື່ອນ ແລະ ນໍາພາຂອງລັດຖະບານ ສປປ ລາວ, ໂດຍສືບຕໍ່ຈາກຜົນຂອງກອງປະຊຸມທົບທວນຄືນ 3 ປີ ຂອງຄະນະຊິ້ນໍາລະດັບຊາດເພື່ອຈັດຕັ້ງປະຕິບັດວາລະ 2030 ແລະ ການພັດທະນາແບບຍືນຍົງ ທີ່ຈັດຂື້ນໃນປີ 2020 ທີ່ຜ່ານມາ, ພາຍໃຕ້ການເປັນປະທານຂອງ ທ່ານນາຍົກລັດຖະມົນຕີ, ປະທານຄະນະຊີ້ນໍາລະດັບຊາດເພື່ອຈັດຕັ້ງປະຕິບັດ ປພຍ.

ລັດຖະບານແຫ່ງ ສປປ ລາວ ໄດ້ສະແດງເຈດຈໍານົງໃນການສົ່ງບົດລາຍງານແຫ່ງຊາດແບບສະໝັກໃຈ ເປັນຄັ້ງທີ່ 2 (ສະບັບທໍາອິດ ແມ່ນສົ່ງໃນປີ 2018) ທີ່ຈະລາຍງານຕໍ່ກອງປະຊຸມເວທີການເມືອງລະດັບສູງເພື່ອການພັດທະນາແບບຍືນຍົງຂອງ ອົງການ ສປຊ ໃນເດືອນກໍລະກົດ ປີ 2021, ໂດຍສະບັບທີ 2 ນີ້ ຈະນໍາເອົາຜົນຂອງການຈັດຕັ້ງປະຕິບັດແຜນປະຕິບັດງານແຫ່ງຊາດ 5 ປີ ຄັ້ງທີ VIII ແລະ ທິດທາງການເຊື່ອມສານ ປພຍ ເຂົ້າໃນແຜນງານ 5 ປີ ຄັ້ງທີ IX ເຂົ້າໃນການລາຍງານ ແລະ ຈະລົງເລິກການລາຍງານ 9 ເປົ້າໝາຍການພັດທະນາທີ່ເປັນບູລິມະສິດ (ປພຍ 1 ລົບລ້າງຄວາມທຸກຍາກ, ປພຍ 2 ລົບລ້າງຄວາມອຶກຫິວ, ປພຍ 3 ການມີສຸຂະພາບ ແລະ ຊີວິດການເປັນຢູ່ທີ່ດີ, ປພຍ 4 ມີການສຶກສາທີ່ມີຄຸນນະພາບ, ປພຍ 5 ມີຄວາມສະເໝີພາບລະຫວ່າງຍິງ-ຊາຍ, ປພຍ 8 ການມີວຽກເຮັດງານທໍາທີ່ມີກຽດ ແລະ ເສດຖະກິດມີການຂະຫຍາຍໂຕ, ປພຍ 13 ມີແຜນຮັບມືກັບການປ່ຽນແປງດິນຟ້າອາກາດ, ປພຍ 17 ເປັນຄູ່ຮ່ວມມືເພື່ອເປົ້າໝາຍການພັດທະນາແບບຍືນຍົງ ແລະ ປພຍ 18 ຊີວິດຢອດໄພຈາກລະເບີດບໍ່ທັນແຕກ).

 ນອກຈາກການຈັດກອງປະຊຸມຄັ້ງນີ້ກັບພາກລັດແລ້ວ, ກອງເລຂາ ປພຍ ແຫ່ງຊາດ ຍັງມີແຜນຈະຈັດກອງປະຊຸມເພື່ອສົ່ງເສີມການມີສ່ວນຮ່ວມຂອງພາກສ່ວນອື່ນໆທີ່ກ່ຽວຂ້ອງໃນການຮ່າງບົດລາຍງານ VNR ສະບັບທີ 2 ນີ້ ໃນທ້າຍເດືອນມີນາ 2021 ອີກດ້ວຍ.

ໃນໂອກາດນີ້, ທ່ານ ໄມທອງ ທໍາມະວົງສາ, ຫົວໜ້າກົມອົງການຈັດຕັ້ງສາກົນ, ກະຊວງການຕ່າງປະເທດ, ທັງເປັນຫົວໜ້າກອງເລຂາ ປພຍ ແຫ່ງຊາດ ໄດ້ເນັ້ນໜັກເຖິງຄວາມໝາຍຄວາມສໍາຄັນຂອງການສົ່ງບົດລາຍງານແຫ່ງຊາດແບບສະໝັກໃຈ, ​ຊຶ່ງການສົ່ງບົດລາຍງານດັ່ງກ່າວ ບໍ່ພຽງແຕ່ຈະສະແດງໃຫ້ເຫັນເຖິງຄວາມໝາຍໝັ້ນອັນແຮງກ້າຂອງລັດຖະບານ ໃນການຈັດຕັ້ງວາລະ 2030 ຄຽງຄູ່ກັບ ເປົ້າໝາຍການພັດທະນາທີ່ເປັນບູລິມະສິດຂອງຊາດ, ແຕ່ຍັງເປັນໂອກາດອັນດີໃນການຕິດຕາມ-ປະເມີນ, ຄຽງຄູ່ກັບການທົບທວນຄືນ ແລະ ລາຍງານຄວາມຄືບໜ້າ, ຜົນສໍາເລັດ, ສິ່ງທ້າທາຍຕ່າງໆໃນການຈັດຕັ້ງປະຕິບັດວາລະສາກົນໃນໄລຍະທີ່ຜ່ານມາອີກດ້ວຍ.

ພ້ອມດຽວກັນນີ້, ທ່ານປະທານ ໄດ້ຊຸກຍູ້ໃຫ້ທຸກພາກສ່ວນຮັດແໜ້ນການຮ່ວມມືເຊິ່ງກັນ ແລະ ກັນ, ໂດຍສະເພາະແມ່ນການມີສ່ວນຮ່ວມ ແລະ ການປະກອບສ່ວນຂອງພາກລັດ, ກໍຄືບັນດາກະຊວງ ແລະ ອົງການລັດທຽບເທົ່າກະຊວງ ໃນການຮ່າງບົດລາຍງານສະບັບທີ່ 2 ນີ້ ເພື່ອຮັບປະກັນເຮັດໃຫ້ເນື້ອໃນມີຄວາມສົມບູນ, ສອດຄ່ອງ ແລະ ເປັນເອກະພາບກັນ ບົນພື້ນຖານ “ພ້ອມກັນກ້າວໄປ”, ​ຊຶ່ງນີ້ຍັງຈະສະແດງໃຫ້ເຫັນເຖິງຄວາມເປັນເຈົ້າການຂອງພາກລັດໃນການວາງແນວທາງ, ນະໂຍບາຍ ແລະ ການເຊື່ອມສານວາລະການພັດທະນາດັ່ງກ່າວເຂົ້າໃນແຜນພັດທະນາເສດຖະກິດ-ສັງຄົມ ແຫ່ງຊາດໃນແຕ່ລະໄລຍະອີກດ້ວຍ.